طقوس اشهر فنانات الرقص الشرقي قبل العمل

دينا اللهم قوي إيمانها عندها طقوس متعودة عليها من ساعة ما ابتدت رقص..
أول حاجة لازم تسخن جسمها عشان عضلاتها متتعبش لما تبتدي الوصلة.
وقبل ما تطلع المسرح لازم تقفل على نفسها دقيقتين في الأوضة وتفضل تردد دعاء بتحبه أوي.. وبتقول:
"الله خير حافظا وهو أرحم الراحمين.. من أمامي ومن خلفي ومن يميني ومن يساري ومن تحتي ومن فوقي
الله أكبر الله أكبر الله أكبر"
وبعدها تنزل الصالة أو تدخل قاعة الفرح اللي هترقص فيه.
والدعاء ده عارفاه من أختها "ريتا".. واللي الناس متعرفوش إن دينا عندها أخت منتقبة اسمها "ريتا".. 
و"ريتا" أختها شقيقة.. وكانت في كلية "تربية موسيقية" بس مشتغلش في المجال وانتقبت وقعدت في البيت.
👇
أما فيفي عبده فـ بينها وبين ربنا عمار.. وعملت 37 عمرة وحجت 5 مرات.. 
وكمان ما بتفوتش فرض.. ولما كانت بترقص في صالات وقت أذان العشاء كانت لازم توقف الفقرة وتروح تصلي وترجع!
ولما الموضوع اتعرف والناس استغربت ردت عليهم وقالت: 
"الصلاه دي أهم حاجة.. صلوا وهتشوفوا حياتكم بعد الصلاة هتبقى كويسة إزاي".
وفيفي كافلة يتمية في بيتها.. وهي بنتها التالتة "عطية الله".. وخدتها من صغرها ربتها مع بناتها وعلمتها في المدرسة الأمريكية ودخلتها أغلى جامعة في مصر.
ووقت ما راحت تحج أول مرة اتريقوا وقالوا ربنا مش هيقبل منها عشان بتجح بفلوس حرام..
بس فيفي مهمهاش وقالتلهم: 
"الرقص حرام ليه إن شاء الله؟.. هو مش شغل زي أي شغل؟..
أنا ماشية بما يرضي الله.. ومظلمتش حد ومعملتش حاجة غلط وبساعد الغلبان.. وبشقى في شغلي وبتعب فيه
أنا مطمنة جدا.. وحاسة إني هقابل ربنا وأنا مستريحة.
ومن هنا مش غريب لما نعرف إنها قبل أي وصلة رقص لازم تقول "الأذكار"!.
👇
والست لوسي بعد ما تلبس بدلة الرقص لازم تقول "توكلت على الله".. 
والقرآن الكريم عمرها ما فارقها قبل طلعوها ع المسرح..
ولوسي زمان كانت بتصلي في رمضان بس.. لحد ما في يوم دعت ربنا يعنيها على الالتزام بالصلاة طول السنة.. 
وبالفعل بعدها حست بشخص بيشدها تروح تتوضى وتصلي.. ومن ساعتها التزمت بالصلاة حتى لو كانت في الكاربيه.
وبسبب شغلها كانت دايما بتصلي الفجر حاضرة
وهي مش شايفة الرقص حرام.
وبتقول: الحړام بيبقى في الخفا لكن الحلال دايما في النور.. والرقص مش في أوض النوم.. الرقص على المسارح وفي الأفراح والكباريهات.. 
وأنا ست سيرة المولى دايما على لساني
👇
وأكيد هتتفاجئوا لما تعرفوا إن صوفينار بتفضل تذكر الله كتير أوي قبل الرقص وتقول "يارب".
والسر في كدا إنها خاېفة ټموت على المسرح فـ عايزه ذكر الله يبقى آخر حاجة على لسانها.
وبتقول: 
بقول يارب قبل ما أطلع أرقص عشان ممكن قلبي يقف في أي وقت، وفي فنانين كتير بيموتوا علي المسرح ولازم أكون قايلة يارب، وربنا بيديني الباور عشان أرقص"!
وربنا يزيدك إيمان يا أخت صوفينار.
👇
وأختها لورديانا بقى لازم تلعب رياضة قبل الرقص.. أما بدرة فضروي تاخد "شوت تكيلة" 
ولو مفيش لازم تشرب ريدبول عشان يبقى عندها طاقة.